صباح الخير يا عاطف.
مفتقداك.
باحاول أفضل البنت الصغيرة اللي انت كنت بكل فخر بتعرفها على كل حد واقف معاك لما باخبط فيك بالصدفة في شوارع وسط البلد.
رحت قريب الكافيه اللي كنت باشوفك فيه ساعات. فاكره؟
آخر مرة شوفتك هناك انت و الجميلة عزة,ضحكت أول ما شوفتني و بحماس عرفتني عليها ( لثالث مرة :) ), و قبل ما تمشي أصريت توصي الشباب اللي بيشتغل في الكافيه انهم يخللوا بالهم مني .
المرة دي لما رحت جابولي الكابتشينو و مكتوب عليه من فوق I love you
أنا بقى قررت اني دي رسالة منك
خليك معايا دايما, و لو لأي سبب تاه مني الطريق, ادفعني بابتسامتك له تاني
منى
11 يونيو 2012 ( 40 يوم منذ رحيل الشهيد عاطف الجوهري)
هناك تعليقان (٢):
الله يرحمه ويحسن اليه، نموذج للانسان الطيب اللي ملوش مكان في عالمنا الخبيث
الله يرحمه عاطف كان انسان جدع جدا ... كان كل ما يشوفني يقوللي يا غطاس يا طويل .. ويقرص وداني ... مفتقدك كتيييييير يا اغلي انسان شفته
إرسال تعليق