الأحد، أغسطس ٠١، ٢٠١٠

بدايات جديدة

كنت خايفة احكي
اكتشفت اني باضيع جزء كبير من متعتي بلحظات خاصة بس عشان قلقانة من حكم الناس
كنت خايفة أقول اني حاسة اني باخد اولى خطواتي على منحدر حب جديد
كنت خايفة الناس تقول هي لحقت؟ او يبصولي على اني شريرة اني تخطيت اللون الأصفر و لقيت سحابة تانية تخطفني بعيد
و بعدين قررت ان كل ده مش مهم. الدنيا صغيرة و التناتيف الملونة مش سهل تتعوض, و اكيد الناس اللي يفرقولي هينبسطوا اني مبسىوطة

فقررت اكتب

مش بافهم الحب. مااعرفش اذا كان ممكن الواحد يحب اكتر من مرة و لا لأ. مش عارفة اذا كان الواحد فعلاممكن يستبدل جلده فيستقبل كل مرة الحب كأنه جديد عليه
بس ده اللي انا حساه. لو سألتوني, انا مش نفس البنت اللي كانت بتكتب هنا من سنتين. اكيد فيه حاجات فيا زي ما هي, بس فيه تفاصيل صغيرة اتغيرت. و التفاصيل دي هي اللي مخلياني حاسة ان الحدوتة اللي انا باكتب اول كلماتها, جديدة عليا.
و جايز اصحى كمان سنتين و اضحك على هبل بنت تشبهني و كانت غاوية حب :)
مش عارفة.
اللي عارفاه هو اللي انا فيه دلوقتي, و دلوقتي انا حاسة اني واقفة على شاطئ بحر جديد عليا. واقفة حافية عند الحتة اللي الموج بييجي و يروح عليها. سايباه يعاكس طراطيف صوابعي بالراحة. مستمتعة بالمداعبة, و بغواية اني اتخيلني بانفض عني كل هدومي و همومي و ارمي نفسي جوة اعمق حتة فيه. مستمتعة باني بس أقف على الطرف و اتخيل لحظات شايلاهالي الدنيا لبعدين.

لو غمضت عيني, هاحس بدفا جسمه بيحضني من ورا, و هاحس بجسمي بيدوب فيه. لو فتحت عيني هاكتشف ان دي مش خيالة من خيالاتي, انا فعلا بادوب فيه

هناك ١٠ تعليقات:

radwa osama يقول...

انا مبسوطه علشانك جدا .. مبسوطه من حته جوايا عميقه
افرحى يا منى.. انت شخص خلق ليفرح.. خلقتى لتنسجى الفرح والاستمتاع بالحب
بحبك يا بنت

شرقاوي يقول...

لأ.. هتصحي أكيد بعد سنتين وهتلاقي انك لسه دايبه حب..
انبسطي وافرحي و بتمنالك كل حاجه حلوه عشان تستحقيها!

سلامات يا حلوه.
:)

faisal يقول...

كالعادة لسه كلامك بيلمس نفس الحتة المجهولة اللي نفسي أحدد مكانها
اقفزي بقلب جامد :)

Unknown يقول...

فعلا أنا كمان مش بافهم الحب. مااعرفش اذا كان ممكن الواحد يحب اكتر من مرة و لا لأ. ساعات بحس إنه عامل زي فيلم مش ممكن الواحد يشوفه أكتر من مرة أو مرتين أو زي النكتة لو واحد ضحك عليها مرة مش بيضحك تاني، بس بعد شوية ممكن يقابل حد يخلي الحب زي أغنية لكايتي ميلوا أو ديف ليبارد ممكن يسمعها و يعيد فيها منغير ما يزهق.

أتمني لك كايتي ملوا مش فيلم لمحمد سعد

ست المرتفعات يقول...

حبى وافرحى وابتسمى
وميهمكيش
وهو مين قبلك كان فهم الحب
بتمنالك كل السعادة

Evaluna يقول...

:) :)
*kisses*

Ibawwad يقول...

أحلى حاجة فى الحب والمشاعر الإنسانية عموماً ان الإنسان ما بيفهماش لإنه بيحسها وهلى اللى بتغير جواهز

غير معرف يقول...

:)
the way you write always reminds me that love itself is worth loving

Amira يقول...

اجمل حاجة في الدنيا الحب
حبي
و دوبي
و عيشيه
الحب دايما جديد
لأنه حياة .. روح

كل ما نحب نشعر و كأنها أول مرة و آخر مرة
لكن الحب كالحياة
متجدد كل مرة
و كل لحظة

يارب دايما تنبسطي

Amira يقول...

اجمل حاجة في الدنيا الحب
حبي
و دوبي
و عيشيه
الحب دايما جديد
لأنه حياة .. روح

كل ما نحب نشعر و كأنها أول مرة و آخر مرة
لكن الحب كالحياة
متجدد كل مرة
و كل لحظة

يارب دايما تنبسطي