الثلاثاء، أبريل ٠٣، ٢٠٠٧

ان تسلب عذريتك

قعدت افكر فى مفهوم العذرية
هو بس حتة الغشاء ده اللى لو اتقطع يبقى خلاص؟ طيب ما فى بنات كتيرة بطبيعة غشاء البكارة بيبقى مثقب بشكل يسمح باختراقه من غيرنزيف, و فيه بنات بيفقدوه من غير ما ياخدوا بالهم فى خلال طفولتهم
و قررت
فيه بوسة تفقدك عذريتك فى لحظات, بوسة تنعش كل حتة فى جسمك, و تحرك سوائل جسمك فى الداخل و الى الخارج
و فيه بوسة تسيبك زى ما انتى, ما اتلمستيش

هى لحظة اللى تبتدى فيها تتحولى من عيلة, لبنت او ست
ممكن لحظة تنقلك بالراحة, و تنطبع جوة ذاكرتك كل تفصيلة صغيرة و جنبها ابتسامة: ريحتك, ريحته, النور, لمسته, صوت نفسه
و ممكن لحظة , تنقلك برضه, بس تخبطك بقسوتها, و تفضل جوة ذاكرتك كل تفاصيلها و فوقيها حتة سودة بتحاولى تدارى بيها الوجع

البنات فى بلدنا بيكبروا بسرعة اوى, بيركنوا طفولتهم و براءتهم على جنب من بدرى عشان يتعلموا ازاى يتفادوا الناس اللى بتحاول تتلزق فى جسمهم, الايادى اللى بتحاول توصل لاى جزأ منهم, الرجالة المقرفة اللة بتكلمهم و و هى مش شايفة الا صدرهم, و يتعلموا ازاى الكلام اللى بيتقالهم فى الشارع يعدى عليهم من غيرما يسيب اثر



انا فقدت عذريتى عند اول راجل غريب مسكنى و انا صغيرة و قعد يحسس على جسمى
لمس صدرى و هو لسة يا دوبك بيكبر و بينقلنى بالراحة من طفلة لبنت
لما مشى ايده عليا و حسيت بانقباضة جوايا و خوف
خوف عمرى ما فهمته. ازاى بنات كتير فينا بيتعرضوا لحاجات كدة و يتسمروا فى مكانهم, ازاى بيخافوا يجروا من الحاجة اللى اصلا مخوفاهم؟
انا فقدت عذريتى لما هو -راجل قد ابويا- فى لحظة خلق جوايا جنب العيلة الصغيرة , بنت تانية حاسة بجسمها و كارهاه, شايفة منحنياته و عايزة استيكة تمسحها و ترجع بس عصاية بايدتين و رجلتين, راس مدورة شايلة شعر منعكش , و بق بيضحك









هناك ١٠ تعليقات:

محمد عبد الغفار يقول...

العذريه هى عذرية القلب والعقل

الغشاء هو كما تفضلتى بالشرح تماماً

الشرف مفهوم عام لا العذريه دليل علي وجوده ولا غياب الغشاء ينقصه

نحن فقط نخلط المفاهيم ببعضها خلطاً

عباس العبد يقول...

فكرة الانتهاك فكرة قديمة
لكن الجديد
انتهاك الرجل
لكن الاعم هو انتهاك الانثى
لانها الحلقة الاضعف
بيسقط عليها الرجل
كل اخطائه و فشله و خياناته
لا اعلم هل المرأة هى من اعطته فرصة
ام الموروث العروبى

karakib يقول...

العذرية موجودة أساسا في التفكير
الكل يبدأ من أعلي ... من المخ
يعني بتضحكني أوي فكرة أن الرجل ليس لديه عذرية .. كلام عبيط و موروث ثقافي أهبل ... الموضوع أكبر من حتة جلد الراجل و الست لديهم عذرية و من الممكن أن يفقدوها
تدوينتك حلوة علي فكرة

غير معرف يقول...

أي
صحيح
بس ليه انا بحس ان كل مرة بيحصل فيها ده زي أول مرة
و مهياش فقدان عذرية , لأ ده أغتصاب

يساري مصري يقول...

عصاية بايدتين و رجلتين, راس مدورة شايلة شعر منعكش , و بق بيضحك
من المفروض ان هي دي النظره السويه اللي من المفروض ان ينظر بها المجتمع للمرأه
لكن مجتمعنا مزروع جواه عدم احترام لكون المرأه و ينظر لها على انها اداه للجنس او للتكاثر
مع انها فرد من افراد المجتمع و ليه شخصيه يعني لافارق
بس معرفش عشان كونا عرب ولا مسلمين فالمرأه عليها محاذير و حاجات مش فاهمها و مش مقتنع بيها
المرأه في مجتمعني مغتصبة الحقوق ( المدنيه و الشخصيه )
البوست بتعتك حلوه و بتطرح اسئله كتير
all the love & respect , keep posting

Memo يقول...

من ساعت ما فتحت البلوج وانا حاسه بانك متميزه
حاسه انك مختلفه اول مره افتح بلوج و احس بالاختلاف في كل شيئ بالطريقه الجميله في التعبير بالرسومات التي تدل على انك محبه للتغير رسومات بسيطه لكن معانيها اكبر من الكلام

من متابعتي للكلام لقيت ان في حجات كتير جرحاكي يمكن ماثره في حياتك يمكن من الصوره الي رسماها لشخصيتك تباني قويه بس انا اعتقد انك بكره هتبقي اقوي

تحشياتي ليكي يا مميزه

Bou-ME يقول...

العذرية هي عذرية القلب و الروح...
و الغشاء ما هو الا واجهة ليها..

على فكرة انت جامدة جداااا...
مش بقولك انت بتفكرني بخالد كساب....

غير معرف يقول...

ماعت

الأول تحياتي أنا كتير باعدي من هنا و مابعلقش كتير من المدونات بحبها و باتابعها كتير و ماعلقش مش عارف ليه
فكرة العذرية في المجتمعات الشرقية عجيبة و ظالمة و بدائية زي ما قلتي
ده نتيجة لترسبات من الأفكار في مجتمعنا البنت \ الست بتتحمل النتيجة دايما لن بيظهر عليها أثر فيسيولوجي يسهل إكتشافه

نتيجة للتدين الظاهري السهل اللي هو بعيد أصلا عن روح الدين الراجل بيبص للست على إنها حاجة( مش حد ) عاجباه لكن هاتوديه في داهية و ده بيخليه يتعامل معاها بطريقة مزيج غريب من الإنتقام و الشهوة الهرمونية مش أكتر

تحياتي لعقلك يا ماعت

Shower-Mirror يقول...

و فى بنات كثير محافظه على الغشاء و قدام اهلهم و مجتمعهم مثال للاخلاق و الاحترام .........

و لكن ....

كلنا عارفين ايه اللى ممكن يحصل من غير الغشاء ما يتأثر .....


عجبنى اوى كلامك ...

انتى عندك حق نظرات الناس المرضى للبنات بتخليهم تكبر بدرى ....

مابالك بلمساتهم ...

تحياتى .... و برده مابتجيش تزورييينى

Wild at Heart يقول...

حبيبتى ماعت
أى واحدة فينا مرت بالتجربة المفزعة دى بتبقى قوية و تقدر تستحمل الأهوال, بتقدر تتغلب على الاكتئاب و القرف و قلة الحيلة...لانها خلاص عدت بأبشع تجربة ممكن تتعرض لها.حاولى تبصى للموضوع من الناحية دى,مش من ناحية اننا ضحايا. احنا فعلا بقينا أقوى
لازم تبقى أقوى يا ماعت و تعرفى انه مش ذنبك و ان ربنا حاينتقم لك اذا ماكنش انتقم خلاص. اكيد حاييجى يوم ننسى اللى حصل, ولو كان اليوم ده هو يوم دخولنا الجنة, و تنسى الذكريات الأليمة دى يا أحلى ماعت على وجه البسيطة
و افتكرى دايما...انت دلوقتى أقوى